Այսօր նորից պարտեզում

Շրջում էի և հիշում

Քեզ արթմնի երազում,

Ոսկի, ոսկի մշուշում...

 

Դու քո հեռու հեռավոր

Անհայտ երկրում արդյոք ինձ

Մտաբերո՞ւմ ես այսօր

Այն ոսկեղեն աշխարհից։ —

 

Հիշո՞ւմ ես դու ակացիան

Եվ պարտեզը իրիկվա

Հանդիպումը մայիսյան

Պատանու և աղջկա։

 

Եվ սենյակը ամփոփիկ

Եվ տնակը հեռավոր,

Գաղտնիքները մեր փոքրիկ,

Սակայն քա՜ղցր, սակայն խո՜ր:

 

Հիշո՞ւմ ես դու այն արագ

Ժամերը, երբ ես ու դու

Նստում էինք անկրակ.—

Դյութանք սրտի՜ և հոգո՜ւ։

 

Եվ խավարում, խավարում

Հիշո՞ւմ ես ջերմ շուրթերի

Հանդիպումը հրահրուն,—

Հուզմունքն արբած սրտերի...

 

Եվ պարտեզում մեր անուշ

Տեսակցությունն այն գիշեր,

Կիսախավարը քնքուշ.–

Ցնորակա՜ն իմ հուշեր...

 

Վահան Տերյան

 

Теги: армянские стихи на армянском языке Vahan Teryan Ваан Терян Վահան Տերյան